Vizita e Kasor nga Serbia shihet si mbështetje për Thaçin

Kryeministrja e Kroacisë, Jadranka Kosor, do të vizitojë të mërkurën Kosovën ku do të takohet me zyrtarët më të lartë të vendit. Para takimit me kryeministrin Hashim Thaçi, Kosor pritet ta takojë kryetarin e Kuvendit, Jakup Krasniqin, si dhe zëvendëskryeministrin Slobodan Petrovic.

Shefja e ekzekutivit të Kroacisë do të vizitojë edhe fshatin Janjevë, ku jetojnë qytetarë të komunitetit kroat. Me zonjën Kasor do të udhëtojë edhe grupi i biznesmenëve kroatë, që do të marrë pjesë në forumin ekonomik Kosovë-Kroaci.

Vizita e kryeministres Kosor në Kosovë nga mediat serbe është cilësuar si “vazhdimësi e propagandimit të politikës antiserbe”. Kjo vizitë është parë si mbështetje për Hashim Thaçin në kohën kur raportet mes Prishtinës dhe Beogradit janë në “pikën më të madhe të vlimit”.

“Futja e gishtit në sy të Beogradit nga ana e Kosor”, e ka cilësuar ditorja “Press” këtë vizitë. /Telegraf