Nikolic: Te Borko shihet Borisi

Të gjithë në Serbi e dinë se Borislav Stefanovic, shefi i ekipit serb të bisedimeve me Prishtinë, flet atë që e mendon dhe që përfaqëson presidenti i Serbisë, Boris Tadic. E pyes veten se pse në bisedime merr pjesë një njeri anonim si Stefanovici, për të cilin unë, e edhe shumica në Serbi, nuk ka dëgjuar kurrë derisa nuk është vendosur në atë post, ka thënë për “Danas” lideri i Partisë Përparimtare serbe, Tomislav Nikolic.
“Pse nuk bisedon presidenti Tadic ose kryeministri Mirko Cvetkovic. Ata të dy duhet të bisedojnë për statusin, në vend që Stefanovic të bisedojë për çështje teknike... Ky është vetëm përforcim i shtetit shqiptar, kryeqytet i të cilit është Prishtina”, ka thënë Nikolic duke u përgjigjur në pohimet e Stefanovicit për “Danas” se kryetari i SNS-së “e di mirë se çfarë do të ndodhte nëse dialogu me institucionet e Kosovës do t’i udhëhiqte Tadici ose Cvetkovici”.

Sipas Stefanovicit, rasti i tillë do të thoshte njohje e pavarësisë së Kosovës. Por, Nikolic mendon se pikërisht bisedimet aktuale nënkuptojnë këtë pranim.

“Dallimi është që në sytë e publikut pavarësinë e pranon Borko, njeriu i cili nuk ka kurrfarë kredibiliteti, e jo Borisi. Por, e pranoj se të gjithë te Borko e njohin Tadicin, e edhe emrat i kanë të ngjashëm. Fatkeqësisht, bashkëbiseduesi anonim po flet edhe në emrin tim dhe të të gjithë qytetarëve serb”, ka thënë Nikolic, duke shtuar se “Tadici dhe Cvtkovici një ditë do ta kruajnë kokën dhe do të thonë se nuk e kanë ditur se çka po bëjnë poshtë”. /Telegrafi/