Shënohet 30 vjetori i betejës së Mehajve në Prekaz

Presidentja e vendit, Atifete Jahjaga në manifestimin kushtuar
Tahir e Nebih Mehajt, me rastin e 30 vjetorit të rënies së tyre tha se
akti heroik i kësaj familjeje, i këtyre burrave, u bë simbol për
Pranverën e 81-shit. Në manifestimin e mbajtur në Prekaz, në
manifestimin kushtuar Tahir e Nebih Mehajt, Jahjaga tha se ardhja në
këtë Kullë të Drenicës na bën krenarë të gjithëve, sepse frymëzohen
gjeneratat me atë që është histori e jona e lavdishme.
“Historia e Kosovës do të ishte krejt ndryshe nëse më 13 maj të vitit
1981 familja e Tahir e Nebih Mehës nuk do të qëndronte, nëse ajo nuk do
ta kryente aktin e mbrojtjes së shtëpisë, të fytyrës dhe të nderit, që
ishte akt i mbrojtjes kombëtare, vepër e dinjitetit të njeriut të kësaj
treve, që armikut ia dha përgjigjen çfarë e meritonte prej kohës”, u
shpreh presidentja.
“Tahir e Nebih Meha, ashtu si edhe të parët e kësaj familjeje, ashtu
si edhe të parët e Drenicës, u bënë simbol për luftën e lavdishme të
Ushtrisë Çlirimtare të Kosovës që i solli lirinë e pavarësinë Kosovës,
që i solli përkrahjen ndërkombëtare dhe intervenimin e NATO-s në sulmet
ajrore kundër Serbisë, dhe përkrahjen e pakursyer të Shteteve të
Bashkuara të Amerikës”, tha Jahjaga.
Ajo vlerësoi se duke i kujtuar e nderuar heronjtë e dëshmorët ne e
nderojmë vetveten, ne i nderojmë vlerat më të larta të njeriut, ne
nderojmë dhe e ndërtojmë të ardhmen.

Ndërkaq, Adem Demaçi, veprimtar i njohur i çështjes kombëtare
vlerësoi tubimet e tilla për t’i bërë me dije rinisë se në çfarë
furtunash e gjakderdhjes ka kaluar populli ynë, i cili nuk është
përkulur asnjëherë. “Ngjarja e 13 majit të 81-shit ka rëndësi historike,
sepse ishte një paralajmërim që shqiptarët dhe Drenica nuk e harruan
kryengritjen e lavdishme as të Azem Galicës e as të Shaban Polluzhës”,
tha ai. /Telegrafi/