Thaçi: Unë, udhëheqës i betejës kundër korrupsionit

Qeveria e Kosovës, Policia e Kosovës dhe Prokuroria e vendit kanë nisur të intensifikojnë punën e përbashkët në luftën kundër korrupsionit dhe krimit të organizuar. Kryeministri Hashim Thaçi, tha se rolin udhëheqës do ta ketë ekzekutivi kosovar.
“Beteja kundër korrupsionit, krimit të organizuar dhe të gjitha dukurive negative do të jetë e gjerë, në të gjithë territorin e Kosovës. Ndërsa, kjo betejë do të udhëhiqet prej institucioneve kosovare me rolin lehtësues, monitorues dhe mbështetës të EULEX-it”, tha të hënën kryeministri Thaçi, pas takimit që pati me kryeprokurorin e Shtetit, Ismet Kabashi dhe me ushtruesin e detyrës së drejtorit të Policisë së Kosovës, Behar Selimi.

“Unë do të vazhdoj të jem udhëheqës i kësaj beteje me mbështetje të plotë nga të gjitha institucionet kosovare, të rendit dhe ligjit dhe përgjegjës i bashkëpunimit të ngushtë me të gjitha autoritetet ndërkombëtare. Pra, që beteja kundër korrupsionit e krimit të organizuar dhe të gjitha dukurive negative të udhëhiqet nga institucionet kosovare”, tha Thaçi.

Ndërkaq, kryeprokurori i Kosovës, Ismet Kabashi, theksoi se prokuroria kosovare ka filluar të punojë lidhur me rastet e korrupsionit dhe do të vazhdojë punën në këtë drejtim në mënyrë permanente.

“Arritëm konsensus të përgjithshëm që prokuroria duhet t’i kryejë detyrat e veta kushtetuese, duke pasur parasysh se vlerësojmë që korrupsioni dhe krimi i organizuar janë dy pengesat kryesore të zhvillimit të Kosovës. Me rastin e marrjes së portit të kryeprokurorit, e kam thënë se prioritet themelor do të jetë lufta e korrupsionit dhe krimit të organizuar”, ka thënë Kabashi.

Prokurorët e Kosovës, sipas tij, kanë kapacitet, guxim dhe vullnet që të merren me lëndët më të rënda të krimit të organizuar dhe korrupsionit.

Në takim ishte i pranishëm edhe ministri i Punëve të Brendshme, Bajram Rexhepi.