Skicimi i hartave, efekt domino për rajonin

Kosova është shtet i pavarur dhe sovran i njohur tashmë nga 69 vende anekënd botës, kështu që idetë për cenim të integritetit territorial të Kosovës, me skicime hartash, janë shumë të rrezikshme, do të kishin efekt domino dhe nuk do të përfundonin me Kosovën, por do të kishin pasoja të paparashikueshme për të gjithë rajonin- ka thënë presidenti Fatmir Sejdiu gjatë një takimi lamtumirës me Lars Freden, ambasador i Suedisë në Maqedoni, jorezident për Kosovën.
“Idetë e tilla kanë për qëllim nxitjen e konflikteve të reja në rajon, ndaj, si të tilla, janë tërësisht të papranueshme”, tha Sejdiu duke bërë thirrje që bashkësia ndërkombëtare, e në veçanti BE-ja, t’ia bëjë të qartë në vazhdimësi Serbisë se qasjet e tilla destabilizuese nuk do të përkrahen asnjëherë.

Presidenti ripohoi gatishmërinë e Kosovës për marrëdhënie të mira me të gjitha vendet e rajonit, duke përfshirë edhe Serbinë. Mirëpo, theksoi ai, Kosova nuk do të pranojë kurrë që të bisedohet për çështje të statusit apo të integritetit territorial të vendit, sepse kjo çështje ka marrë fund një herë e përgjithmonë.

Gjithashtu, Sejdiu tha se Kosova ka vizion të qartë për t’u integruar në BE dhe në NATO dhe, si gjithmonë deri më tani, pret mbështetjen e plotë të Suedisë për jetësimin këtij synimi madhor. Ndërkaq, ambasadori Freden tha se Suedia mbështet fuqishëm integrimin e Kosovës në strukturat euroatlantike, si dhe kundërshton qartë çfarëdo përpjekje që ka për qëllim ta cenojë integritetin territorial dhe sovranitetin e Kosovës