BE-ja përkrah përgatitjet për regjistrimin e popullsisë në Kosovë

Gjatë 30 muajve të ardhshëm, një grup i ekspertëve ndërkombëtarë dhe vendës do të punojnë së bashku me institucionet e Kosovës për të ngritur kapacitetet e Zyrës së Statistikave për ta organizuar regjistrimin në bazë të standardeve ndërkombëtare.
“Të dhënat e mbledhura përmes regjistrimit të popullsisë do të ofrojnë një perspektivë tërësisht të re për zhvillimin e Kosovës. Statistikat e besueshme janë bazë për përmirësimin e jetës së të gjithëve në Kosovë pa marrë parasysh se kush janë ata dhe ku jetojnë”, tha të hënën Kjartan Björnsson, shef i Operacioneve të Zyrës ndërlidhëse të KE-së.

Për të pasur një regjistrim të suksesshëm, ndihma e ekspertëve do ketë për synim të ndihmojë qeverinë edhe në fushatën për përfshirjen e komuniteteve pakicë.

Projekti i tanishëm i përkrahjes është pjesë e skemës së përgjithshme të BE-së për ndihmë. Komisioni Evropian dhe EUROSTAT-i kanë dhënë ndihmë të konsiderueshme për Entin e Statistikës në Kosovës në përgatitjet e regjistrimit të popullsisë që prej 2005 dhe do të vazhdojë të ofrojë përkrahje gjatë tërë procesit të regjistrimit.

Shuma e përgjithshme e fondeve të BE-së që janë shpenzuar apo që janë ndarë për aktivitetet e ardhshme deri më tani arrin në më shumë se € 6 milionë.

Zyra ndërlidhëse e Komisionit Evropian, Enti i Statistikës në Kosovës dhe Ministria e Administratës Publike mbajtën mbledhjen e parë të projektit për përkrahje teknike për përgatitjen e regjistrimit të popullsisë dhe ekonomive shtëpiake të Kosovës në prill 2011.