Nuk janë bërë përgatitjet për bisedime me Serbinë

Kosova nuk ka nisur fare përgatitjet për dialog me Serbinë, ka thënë zëvendëskryeministri në largim i Kosovës, Hajredin Kuçi.
Mirëpo, ka qëndrime të ndryshme të bartësve institucional rreth përgatitjeve për dialog me Serbinë.

Se Kosova tashmë ka filluar përgatitjet për dialog teknik me Serbinë qe shprehur këtë të premte zëvendësministrja e Punëve të Jashtme në largim Vlora Çitaku, në seancën e Këshillit të Sigurimit të OKB-së në New York.

“Qeveria e Kosovës tashmë ka nisur përgatitjet për bisedime të çështjeve teknike”, ka thënë ajo.

Mirëpo, zëvendëskryeministri Kuçi ka thënë për gazetën Koha Ditore se Kosova megjithatë mbetet ende në pozicionin e deklaruar edhe më herët sa u përket përgatitjeve për bisedime.

“Jemi në atë pozicion që kemi qenë edhe më herët. Bisedimet fillojnë pas zgjedhjeve të përgjithshme në Kosovë e pas konsolidimit të Qeverisë”, ka thënë Kuçi.

Ai edhe njëherë i ka përmendur çështjet për të cilat pala kosovare është e gatshme që të ofrojë bashkëpunimin e saj. “Me Serbinë mund të bisedohet çështja e personave të pagjetur, çështja e regjistrave kadastralë, transportit, bashkëpunimit ekonomik, njoftimi i dukurive të ndryshme ndërkufitare e kështu”, ka thënë ai.

Kuçi ka mohuar kategorikisht se Prishtina ka për të biseduar ndonjëherë me Beogradin për tema politike.
Krenar Gashi, nga KIPRED-i konsideron se realisht bisedimet me Serbinë, tanimë ekzistojnë dhe janë duke u zhvilluar për një kohë të gjatë.

“Kosova dhe Serbia janë duke biseduar që një kohë të gjatë mes vete çështjen e të pagjeturve”, ka thënë Gashi. Ai ka vlerësuar se institucionet e Kosovës nuk do të duhej dhe nuk mund të bëjnë ndonjë përgatitje për dialog, “për shkak se atyre realisht u ka skaduar mandati”.

Deklarimin e zëvendësministres në Këshill të OKB-s, Gashi e sheh më tepër si retorikë që është dashur të përdoret atje.