Bisedime me ndërmjetësit

Ngjarjet e fundit në veri duket se po diktojnë edhe rrjedhën e dialogut.

Aktualisht, negociatorët kosovarë dhe serbë janë duke zhvilluar bisedime me ndërmjetësit në Bruksel, por nuk janë takuar ende së bashku.

Lajmi bëhet i ditur nga Maja Kocijancic, zëdhënëse e shefes së diplomacisë evropiane, Catherine Ashton.

“Takimi i djeshëm është shtyrë për shkak të ngjarjeve (të fundit në veri) dhe ardhjes së vonë të negociatorëve serbë. Aktualisht ata janë në kontakt me lehtësuesin. Deri tash nuk kam lajme tjera”, ka thënë Kocijancic për “Radio Evropa e Lirë”.

Në anën tjetër, kreu i delegacionit serb në bisedimet me Kosovën, Borko Stefanovic, ka thënë se dialogu me Prishtinën do të shtyhet, “derisa në bisedimet me përfaqësuesit e bashkësisë ndërkombëtare, nuk arrin rezultate konkrete, sa i përket krizës në veri”.

Një natë më parë, kryenegociatorja Edita Tahiri ka thënë se pala kosovare ka kërkuar që krahas agjendës së paralajmëruar, sot të bisedohet edhe për 5 marrëveshjet e arritura më herët, e të cilat nuk po zbatohen nga Serbia.

Në këtë raund të bisedimeve mes Prishtinës dhe Beogradit është dashur të diskutohet energjia, telekomunikacioni dhe bashkëpunimi rajonal. /Telegrafi/