Kosova nuk ka lëshuar pe në bisedime

Kryenegociatorja e Kosovës në bisedimet me Serbinë, Edita Tahiri, ka mbrojtur të shtunën marrëveshjen e arritur në Bruksel dy ditë më parë, duke e cilësuar të rëndësishme për Kosovën, pasi që së shpejti, siç tha ajo, pritet të ketë tregti të lirë midis dy vendeve.
Ajo demantoi deklaratat e ndryshme lidhur me atë se Kosova ka lëshuar pe në këto bisedime, pasi që, sipas saj, vulat që Serbia i ka njohur janë vula siç kanë qenë që nga shpallja e Pavarësisë së Kosovës.

“Prej vitit 2008 në gjithë territorin e Kosovës vulat janë ‘Doganat e Kosovës’ dhe këtë Stefanovic dhe pala serbe e ka ditur. Ata e kanë ditur dhe ne u kemi thënë se këto vula njihen nga Bashkimi Evropian, prandaj nëse dikush ka bërë kompromise këtu është Serbia”, ka thënë Tahiri, ndërsa transmeton Zëri.

Ajo po ashtu siguroi se pikat doganore 1 dhe 31 shumë shpejt do të funksionojnë dhe se me ato do të administrojë Republika e Kosovës. Sa i përket marrëveshjes tjetër të arritur për kthimin regjistrave kadastralë, ajo tha se kjo marrëveshje e obligon Serbinë që t’ia kthejë Kosovës të gjitha dokumentet që i kanë munguar prej 12 vjetësh. /Telegrafi/