Prishtina nuk është e gatshme për bisedime

Kryetari i Kuvendit dhe u.d. i presidentit të Kosovës, Jakup Krasniqi, ka deklaruar se partitë politike në Prishtinë në këtë moment nuk janë të përgatitura për të nisur dialogun me Serbinë.
“Mendojmë se partitë në këto rrethana nuk janë të gatshme që të bisedojnë me Beogradin. Nëse tashmë kemi zgjedhje të jashtëzakonshme, atëherë do të ishte e drejtë që dialogu të fillojë vetëm pas konstituimit të institucioneve të reja të dala nga këto zgjedhje. Ne nuk përjashtojmë mundësinë që qysh në këtë fazë të fillojnë përgatitjet për këto biseda, dhe këto natyrisht duhet t’i mbikëqyrë BE-ja”, ka deklaruar Krasniqi për Deutsche Welle.

Krasniqi ka sqaruar se Kosova në këtë moment nuk ka president, guvernator të bankës dhe nuk ka miratuar buxhetin për vitin e ardhshëm. Ai ka shtuar se në Kosovë mund të flitet për krizë institucionale, e cila mund të zgjidhet në zgjedhjet e jashtëzakonshme, të cilat do të mbahen brenda 40 ditëve.