Ponosh: Serbia është kaherë e gatshme për bisedime

Beograd, 23 janar – Ndihmësministri i Punëve të Jashtme të Serbisë, Zdravko Ponosh, ka thënë se Beogradi ka muaj që është i gatshëm për bisedime me Prishtinën dhe atë pa parakushte dhe zgjidhje definitive.
“Janë të mundshëm të gjithë skenarët. Ka disa muaj që jemi të gatshëm për bisedime. Tash presim Prishtinën”, ka thënë Ponosh për gazetën “Press”.
“Në bisedime do të hyjmë pa parakushte. Pa zgjidhje definitive, sepse nëse do t’i kishim këto, bisedimet nuk do të kishin kuptim”, ka thënë ai.
“Në të kundërtën, do të ktheheshim në atë që na ka ofruar Ahtisari dhe kjo është e papranueshme dhe e paqëndrueshme. Nëse do të ketë qasje të këtillë, atëherë bisedimet nuk kanë kuptim”, tha ai.
Përgjigjen se kur do të fillojnë bisedimet duhet kërkuar në Prishtinë, ndërsa kur do të përfundojnë varet nga ajo se “sa do të jemi konstruktivë”, vlerëson Ponosh, duke shtuar se “jemi të gatshëm për të qenë konstruktivë dhe për ne nuk ka tema të ndaluara”.
Në pyetjen se a është temë e ndaluar ndarja e Kosovës, Ponosh ka thënë se “kjo nuk është pozicion i yni në bisedime, ndërsa do të shohim se me çka do të paraqitet ana tjetër”.