ASHAK: Regjistrim i pavlershëm i popullsisë

Akademia e Shkencave dhe e Arteve e Kosovës ka bërë të ditur se
nuk e konsideron të vlershëm rezultatin e regjistrimit të popullsisë në
Kosovë, prandaj sugjeron të gjenden mënyra për mbajtjen e një
regjistrimi të ri, të përgatitur si duhet.ASHAK përmes një
njoftimi për media kujton faktin se, që me shpalljen e afatit të
regjistrimit të popullsisë në Kosovë u deklarua qartë se procesi nuk
ishte i përgatitur si duhet dhe prandaj barte me vete rrezikun që të
dështonte.
“Në kumtesën e saj të datës 28 shkurt 2011, Kryesia e Akademisë
kishte kërkuar shtyrjen e afatit të regjistrimit, për shkak se tashmë
ishin vërejtur përgatitje jo të mjaftueshme profesionale, teknike dhe
organizative, si dhe tendencat për politizimin e procesit”, thuhet më
tej në komunikatë.
Shpallja e rezultateve preliminare të regjistrimit të popullsisë në
Kosovë, për fat të keq, siç thuhet më tej në komunikatë, e vërtetoi
shqetësimin e Kryesisë së Akademisë, se procesi jo vetëm që do të
dështonte, por do të linte pasoja të shumëfishta shoqërore, politike dhe
profesionale.
Sipas ASHAK, shkaqet e dështimit të regjistrimit tashmë janë të
njohura si për profesionistët e përfshirë ose të papërfshirë në proces,
ashtu edhe për opinionin e gjerë, kështu që nuk mendojmë se është e
nevojshme të përsëriten me këtë rast”.
“Kryesia e Akademisë e sheh të nevojshme të njoftojë opinionin, i
cili është i shqetësuar me të drejtë, se nuk e konsideron të vlershëm
rezultatin e këtij regjistrimi, prandaj sugjeron të gjenden mënyra për
mbajtjen e një regjistrimi të ri, të përgatitur si duhet”, thuhet në
komunikatë. /Telegrafi/