Ftohen të gjithë qytetarët të marrin pjesë në regjistrim

Regjistrimi i popullsisë është një ngjarje historike për Kosovën, sepse për herë të parë pas tridhjetë vjetësh vendi do t’i ketë të dhënat zyrtare mbi popullsinë, ekonomitë familjare dhe banesat. Regjistrimi do të mbahet në pranverën e vitit të ardhshëm, prej 1 deri më 15 prill 2011, ka thënë ministrja e Administratës Publike, Edita Tahiri.
Ministrja në largim në takimin joformal me OJQ-të dhe shoqërinë civile, lidhur me projektin e regjistrimit të popullsisë, të organizuar nga Zyra Ndërlidhëse e Komisionit Evropian tha se regjistrimi ka rëndësi të shumëfishtë për arsye se mundëson përcaktimin e drejtimeve në planin politik, ekonomik, shoqëror, demografik, akademik e fusha të tjera.

“Ju bëje me dije se Ministria e Administratës Publike, si bartëse e projektit po zhvillon përgatitjet e duhura për regjistrimin e popullsisë, sipas standardeve ndërkombëtare dhe në bashkëpunim të plotë me Organizatën Ndërkombëtare për Monitorim (IMO), Eurostatin, ECLO-n dhe partnerë tjerë ndërkombëtar. Disa nga komponentët qenësor janë realizuar me sukses. Kemi aprovuar ligjin për regjistrim, kemi konsoliduar strukturat dhe kapacitetet tekniko-profesionale të Entit Statistikor të Kosovës, si dhe kemi konsoliduar Fondin e mirëbesimit multidonatorësh, për mbështetjen financiare të regjistrimit”, tha ajo.

Me këtë rast, ministrja në largim, Edita Tahiri ftoi sërish gjithë qytetarët dhe komunitetet që të marrin pjesë në regjistrim, për të mirën e të gjithëve.