Mosfunksionimi i gjykatave problem për qytetarët në veri

Me mijëra lëndë për raste të ndryshme për kundërvajtje kanë
mbetur në sirtarë pa u shqyrtuar në gjykata dhe kjo është një problem
shumë i madh për qytetarët, u tha të martën në mbledhjen e Këshillit
komunal për siguri në bashkësi në Mitrovicë. Këshilli
Komunal për Siguri në Bashkësi (KKSB) ka mbajtur të martën takimin e
parë për këtë vit në Mitrovicë, ku përfaqësues të institucioneve,
organizatave të ndryshme joqeveritare të bashkësive fetare e etnike,
kanë folur për sfida të ndryshme të sigurisë që ballafaqohen qytetarët
mitrovicas.
Drejtori për Mbrojtje dhe Shpëtim, Behxhet Bala, tha se është
paraparë që gjatë vitit KKSB të mbaj dhjetë takime. “Është ky këshill me
rëndësi për sigurinë e qytetarëve, meqë këtu marrin pjesë përfaqësues
të institucioneve civile dhe të sigurisë, mandej shoqërisë civile,
mediave, komuniteteve etnike e fetare”.
Sa i përket situatës së sigurisë dhe problemeve aktuale në këtë
aspekt, komandanti i stacionit të policisë në jug, Avni Zabeli, tha se
gjendja në jug është e qetë, ndërsa sfiduese mbetet mosfunksionimi i
gjykatave. “Me mijëra lëndë për raste të ndryshme për kundërvajtje kanë
mbetur në sirtarët tanë, pa u shqyrtuar në gjykata dhe kjo është një
problem shumë i madh”.
Ai foli edhe rritje të numrit të rasteve të kontrabandës në jug,
përkundër masave që janë ndërmarrë nga autoritetet gjegjëse. /Telegrafi/