Lënda e komunarëve i kalohet EULEX-it

Çështja e gjashtë zyrtarëve komunalë të Prishtinës mund t’i kalohet prokurorëve të EULEX-it, kanë paralajmëruar avokatët mbrojtës, pas seancës dëgjimore, që u mbajt të mërkurën. Në Gjykatën e Qarkut të Prishtinës është mbajtur seanca dëgjimore që u mbajt me prokuroren e EULEX-it, Maria Silvia.
Tomë Gashi, avokat mbrojtës i Hazir Krasniqit tha se prokurorja shqyrtoi lëndën me kërkesë të avokatëve që çështja e zyrtarëve komunalë të kalojë në duart e EULEX-it.

“Ne i kemi paraqitur të gjitha dëshmitë lidhur me kërkesën tonë. Kemi bërë këtë kërkesë sepse e kemi parë që çështja është politizuar”, tha avokati Gashi, pas përfundimit të seancës, raportoi Express.

Sipas tij, ka mbetur që gjykata ta shqyrtojë epilogun dhe të marrë vendim lidhur me kërkesën.

Seanca e parë për gjashtë zyrtarët komunalë është planifikuar të mbahet pak ditë, pasi ata janë arrestuar. Por, me një kërkesë të avokatëve mbrojtës, seanca është ndërprerë, me arsyen se nuk i besojnë gjykatësve vendës.

Më 3 maj, Policia e Kosovës ka arrestuar gjashtë zyrtarë të lartë të Komunës së Prishtinës, përfshirë disa drejtorë, për “shpërdorim të pozitës zyrtare ose të autorizimit”.

Arrestimi është kryer nga Drejtoria e Hetimeve të Krimeve Ekonomike dhe Korrupsionit, njësia në Prishtine. Ata dyshohen për keqpërdorime në Komunën e Prishtinës, lidhur me një tender i cili ka pasur të bëjë me mbulimin e lumit Prishtevasja. Të arrestuarit janë” Ridvan Shahinit, drejtor për Infrastrukturë Lokale, Qazim Bajramit, kryetar i Organit Mbikëqyrës, pastaj anëtarëve të këtij organi Refik Sadikut, Hazir Krasniqit e Halil Fejziut si dhe Ekrem Rexhës, shef i Prokurimit në Komunë. /Telegrafi/