“Vetëvendosje” nuk ka marrë pjesë në organizimin e protestës

Protesta me moto: “Të mbrohet sovraniteti i Kosovës”, që është mbajtur të dielën në Mitrovicë, është organizuar nga Organizata e Veteranëve, Shoqata e Invalidëve dhe ajo e Familjeve të Dëshmorëve të Luftës së UÇK-së dhe jo edhe nga ‘Lëvizja Vetëvendosje’ siç është thënë në disa media.
Protesta, siç bëhet e ditur në një komunikatë të OVL-UÇK, është përkrahur në mënyrë deklarative nga disa subjekte politike opozitare dhe OJQ, ndërkohë që i vetmi subjekt politik që e ka përkrahur dhe ka pasur takim me drejtuesit kryesor të saj është ‘Lëvizja për Bashkim’.

“Ne i falënderojmë protestuesit që dje ishin dinjitozë në protestën në Mitrovicë, falënderojmë gjithashtu Policinë e Kosovës e cila bashkë me ne ka kontribuar që gjendja të mos eskalojë sepse dikujt si kësaj të ashtuquajturës ‘Lëvizje’, i konvenon kacafytja me Policinë tonë siç ndodh gati në çdo protestë të tyre. Ne jemi të vetëdijshëm se për ç’do eskalim të mundshëm përgjegjësi kryesore mban organizatori nëse nuk e lajmëron protestën në Polici, në momentin kur e lajmëron, siç e kemi bërë ne, përgjegjësia është e përbashkët”, theksohet në komunikatë.

Këshilli Organizues e vlerëson protestën si të suksesshme. “Në vazhdimësi do t’i përcjellim zhvillimet politike dhe reagimet tona do të jenë në përputhje me situatën’, përfundon komunikata.