EULEX-i s’ka shkop magjik

Shefi i EULEX-it, Xavier de Marnhac ka reaguar ndaj deklaratave të përfaqësuesve institucional kundër këtij misioni. Ai ka thënë se kosovarët duhet të punojnë me përkushtim për të përforcuar rendin dhe ligjin dhe të mos bëjnë presion që EULEX-i të zgjidh problemet në mënyrë magjike.
Shefi i EULEX-it, në një intervistë për Radio Kosovën, iu është kundërvënë akuzave të përfaqësuesve të institucioneve të vendit se ky mision nuk është duke e bërë punën e tij si duhet. Marnhac ka thënë se këto janë kritika tejet të pavend ngase sipas tij, EULEX-i është duke punuar me përkushtim në misionin e tij.

“Nuk është në rregull të thuhet se EULEX-i nuk është efikas ose duke punuar si duhet. Ne prej fillimit iu kemi qasur me përkushtim punës në Kosovë. EULEX-i është si çdo trup i njeriut që jo domosdoshmërisht ka konstrukt perfekt. Por sa i përket punës ne jemi duke bërë më të mirën e mundshme, jemi duke punuar shumë”.

Marnhac ka thënë se nuk duhet pritur që të gjitha gjërat të kryhen nga EULEX-i. Ai ka numëruar disa verdikte gjyqësore që janë dhënë në disa raste korrupsioni dhe disa të tjera që janë në proces.

Kreu i EULEX-it ka thënë po ashtu se nuk pajtohet se problemi i veriut të vendit ka ngecur tërësisht. Marnhac gjithashtu ka folur edhe për procesin e bisedimeve me Serbinë. Ai ka thënë se Kosovës i nevojitet edhe shumë punë në synimet e saj për t’u bërë pjesë e liberalizmit të vizave. /Telegrafi/