Limaj: Ta bëjmë një memorial në Prishtinë

Deputeti Fatmir Limaj në Kuvendin e Kosovës me rastin e debatit për masakrën në Burgun e Dubravës kritikoi për faktin se vetëm në përvjetor bisedohet për të tilla çështje, ndërkaq nuk ndërmerret asgjë konkrete për të kërkuar drejtësi për krimin e bërë në Kosovë.
Limaj tha se më së paku duhet pritur që nga qytetarët që kanë sakrifikuar të ndjekin legalisht këtë çështje, gjegjësisht krimin që është bërë në Kosovë, pasi sipas tij qytetarët kanë sakrifikuar pikërisht për shtetin, dhe shteti i Kosovës duhet të ndërmarrë tashmë hapa të tillë për të kërkuar drejtësi për krimet e bëra në Kosovë.

Ai tha se pas shumë vitesh gjeneratat e ardhshme do të gjykojnë në bazë të proceseve gjyqësore, e jo në bazë të librave dhe pohimeve. E referuar proceseve gjyqësore, aktualisht sipas tij, Kosova del të ketë sulmuar Beogradin e të ketë bërë krime e terror, e jo Serbia.

Deputeti Limaj tha se nuk duhet t’iu thuhet individëve që kanë pësuar të sjellin dëshmi, po shteti i Kosovës tashmë duhet të merret me këtë çështje. Ai tha se Prokuroria duhet të aktivizohet dhe t’i shkohet deri në fund drejtësisë, në mënyrë që të konfirmohet kush ka bërë krime.

Më tej, ai inkurajoi edhe femrat e dhunuar gjatë luftës që të mos heshtin, por të dalin dhe ta thonë të vërtetën. Limaj po ashtu kërkoi që të bëhet një memorial në Prishtinë, për terrorin që është bërë në Kosovë. /Telegrafi/