Jahjaga kërkon fillimin e marrëveshjeve kontraktuale me BE-në

Presidentja e vendit, Atifete Jahjaga dhe presidenti i Komisionit Evropian, Jose Manuel Barroso u pajtuan se në muajt e ardhshëm pritet punë intensive për avancimin e agjendës evropiane nga ana e institucioneve të Kosovës.
Jahjaga në takimin me presidentin e KE-së, Barroso dhe komisionerin Stefan Fule kërkoi heqjen e referencës 1244 ndaj Kosovës nga ana e Brukselit si dhe domosdoshmërinë e fillimit të marrëveshjeve kontraktuale me BE-në.
“Marrja e udhërrëfyesit për liberalizimin e vizave do të ndihmonte agjendën evropiane të Kosovës dhe reformat e brendshme”, u shpreh Jahjaga.
Jahjaga po ashtu i njoftoi evropianët se procesi i ndryshimeve kushtetuese dhe ndryshimit të ligjit zgjedhor do të vazhdojë, ndërsa duke folur rreth bisedimeve me Serbinë tha se dialogu është i rëndësishëm.
Ndërkaq, presidenti i Komisionit Evropian Jose Manuel Barroso tha e Kosova tash e ka mundësinë më të mirë për progres nëpërmjet reformave të brendshme.
“Zbatimi i reformave të brendshme është i rëndësishëm edhe për fillimin e dialogut për liberalizimin e vizave”, citohet të ketë thënë Barroso.
Në sferën e sundimit të ligjit, Barroso tha se në luftën kundër korrupsionit dhe krimit të organizuar, BE-ja i jep mbështetje të plotë misionit të EULEX-it në Kosovë dhe inkurajoi që institucionet e Kosovës ta bëjnë të njëjtën.
Ai shtoi se shtetet anëtare të BE-se i kushtojnë rëndësi të veçantë dialogut ndërmjet Kosovës dhe Serbisë, duke cekur se normalizimi i marrëdhënieve të fqinjësisë është një prej kushteve themelore në rrugën e Kosovës dhe Serbisë drejt Bashkimit Evropian.
Barroso e ftoi presidenten Jahjaga në vizitë zyrtare në Bruksel. /Telegrafi/