Partitë opozitare kritikojnë vizitën e Jahjagës në Tetovë

Partitë politike shqiptare të opozitës e kanë kritikuar vizitën e
paparalajmëruar të presidentes së Kosovës, Atifete Jahjaga në Tetovë.Partitë
opozitare nuk kanë dashur të japin qëndrimet zyrtare, mirëpo janë të
irituara nga veprimi i tillë i një presidente të një vende, që vjen në
një vizitë pa protokolle, pa paralajmërime dhe në mënyrë private në
Maqedoni.
“Ju lutem s’kemi çka të diskutojmë, kjo është skandaloze, se si një
presidente e një vendi vjen në këtë mënyrë fshehurazi dhe takohet me
krerë të një parti, ku bëhet bujë mediale për atë parti në këtë fushatë
zgjedhjesh. Kjo është e papranueshme dhe presidentja e Kosovës duhet të
dal publikisht të sqarojë vizitën”, theksoi një zyrtar i lartë i një
partie opozitare në Shkup për agjencinë INA.
Nga ana tjetër, vizita u shfrytëzua nga partia shqiptare deri tani në
pushtet BDI, ku zyrtarët e saj pritën presidenten Jahjaga në një nga
kafenetë e Tetovës.
Nga Presidenca e Maqedonisë theksojnë se nuk ka pasur asnjë protokoll
për të takuar ministren kosovare dhe nuk dëshirojnë që të komentojnë
qëndrimin e saj në Maqedoni.
Nga BDI nuk japin hollësi lidhur me takimin, që sipas tyre ka qenë,
thjesht, jozyrtar dhe pa ndonjë agjendë të veçantë për t’u bërë e ditur
për mediat.
Presidenca e Kosovës bëri të ditur se vizita e Jahjagës ka qenë
private. Jahjaga të premten ka mbërritur në Tetovë vetëm pak orë pasi që
kishte zhvilluar takime në Prishtinë me presidentin e KE-së, Jose
Manuel Barroso. /Telegrafi/