Qytetarët kritikojnë policinë për shkelje të rregullave në trafik

Pjesëtarët e Policisë se Kosovës, shpeshherë ndëshkohen nga vetë kolegët e tyre për mosrespektimin e rregullave në trafik. Këtë e pohojnë zyrtarët e Policisë se Kosovës, ndërkohë që edhe qytetarët drejtojnë kritika kundrejt pjesëtarëve të policisë, të cilët i shkelin rregullat në trafik më shpesh se vetë qytetarët.
Veprimet që janë në kundërshtim me ligjin sa i përket rregullave në trafik, nuk i gjejmë vetëm të qytetarët, por edhe te ata të cilët janë të obliguar t’i mbikëqyrin dhe zbatojnë ato, në këtë rast pjesëtarët e Policisë së Kosovës. Qytetarët, thonë se ndëshkohen me gjoba çdo ditë në trafik, por në anën tjetër shohin kur pjesëtarët e Policisë së Kosovës, vet nuk i zbatojnë rregullat.

“Shumica prej tyre as qe i dinë rregullat e komunikacionit. Kurrë unë nuk kam parë që policia i ka vënë rripat e sigurisë. Ne automjete zyrtare pihet duhani, në automjete zyrtare luhet vide-lojra me llap-topa”, thotë një qytetarë.

“Janë edhe ata shumë të papërgjegjshëm në komunikacion, ka raste kur ata tregohen shumë të pakulturuar. Si p.sh. më së shumti më pengon kur i lëshojnë sirenat pa lidhje kur nuk ka nevojë urgjence hiç”.

Një qytetar nga Prishtina, thotë se është dëshmitar kur pjesëtarët e policisë nuk i kanë respektuar rregullat në trafikun rrugor.

“Kam pasë raste kur i kam pa edhe vetë që s’i respektojnë. Si psh, kalimi te këmbësorët nuk i japin përparësi edhe kalimi në semafor të kuq si dhe shumë raste të tjera si ndoshta edhe me i cek bëhen shumë”.

Zëdhënësi i Policisë së Kosovës, Brahim Sadriu, pohon se ka raste kur policëve të Kosovës u janë shqiptuar gjoba për mosrespektim të rregullave në trafikun rrugor.

“Ka raste që edhe janë shqiptuar dënime që nuk i janë përmbajtur rregullave në trafik. Në kundërvajtje do të thotë ka pasur kryesisht për mosvendosjen e rripave të sigurisë si dhe të natyrave të tjera. Mirëpo, në trafik nuk është askush mbi ligjin edhe veturat e policisë edhe pse janë zyrtare iu shqiptohet dënimi”, thotë Sadriu.

Zëdhënësi Sadriu thotë se edhe në Policinë e Kosovës vepron njësiti i veçantë, i cili inspekton punën e Policisë dhe se, sipas tij, kjo dëshmon se “askush nuk është mbi ligjin”. /RTK/