Çeku raporton në Shtabin Qendror të NATO-s

Ministri Agim Çeku, dhe komandanti i FSK-së, gjenerallejtënant Sylejman Selimi, të hënën vizituan Shtabin Qendror të NATO-s në Bruksel, ku janë takuar me përfaqësues të lartë të NATO-s si dhe me ambasadorë e përfaqësues të vendeve partnere të NATO-s dhe KFOR-it.
Ministri Çeku, siç bëhet e ditur në një komunikatë të MFSK-së, i raportoi zëvendës sekretarit gjeneral të NATO-s, ambasador Claudio Bisogniero, për arritjet e FSK-së si forcë multietnike dhe për zhvillimin drejt arritjes së Kapaciteteve të Plota Operacionale.

Minisitri Çeku shprehi falënderimin që NATO-ja dhe KFOR-i po mbështesin FSK-në, dhe shfaqi shpresën që FSK-ja në fund të këtij viti, do të pranojë rekomandim pozitiv nga KFOR-i për arritjen e Kapaciteteve të Plota Operacionale.

Ministri dhe komandanti i FSK-së po ashtu morën pjesë në drekën e organizuar nga ambasadori i Republikës së Shqipërisë në NATO, Artur Kuko

Në komunikatë bëhet e ditur se Çeku do të takojë edhe delegacionin ushtarak të SHBA-ve në NATO, për të diskutuar zhvillimin e bashkëpunimit në të ardhmen.

Lidhur me takimet e tij në Bruksel, Çeku theksoi se “ishin takime shumë frytdhënëse, në të cilat u shkëmbyen pikëpamje lidhur me të ardhmen e FSK-së”.

“Unë, dua të tërheq vëmendjen në rëndësinë e bashkëpunimit me NATO-n dhe KFOR-in, dhe se Kosova i jep rëndësi të veçantë zhvillimit tonë profesional dhe progresit drejt integrimeve euro-atlantike”, ka thënë ai. /Zëri/Telegrafi/