Çeku e Zyrapi s’flasin me një zë për Limajn

Dy ish-shefat e Shtabit të Përgjithshëm të Ushtrisë Çlirimtare të Kosovës, Bislim Zyrapi e Agim Çeku, u kanë dhënë deklarata kontradiktore prokurorëve ndërkombëtarë në lidhje me përfshirjen e Fatmir Limajt në operacionin “Shigjeta”, i cili ishte përgatitur në Shqipëri gjatë pranverës së vitit 2009.

Ata janë të parët anëtarë të Shtabit të Përgjithshëm të UÇK-së që i janë përgjigjur interesimit të prokurorëve se ku mund të ketë qenë Limaj në pjesën e parë të vitit 1999, kur në fshatin Kleçkë dyshohet të jenë kryer krime lufte dhe torturime ndaj të burgosurve, pikërisht me urdhër të tij.

Derisa ministri aktual i Forcës së Sigurisë të Kosovës, Agim Çeku, i ka thënë prokurorit publik ndërkombëtar, Olivier Beauvallet, se gjatë një mbledhjeje të Shtabit komandues ishte vendosur që Limaj bashkë me disa eprorë të tjerë të shkonin në Shqipëri për ta përgatitur operacionin ushtarak “Shigjeta”, pararendësi i tij në krye të Shtabit të Përgjithshëm të UÇK-së, Bislim Zyrapi, ka mohuar para prokurorit tjetër, Maurizio Salustro, që emri i Limajt të jetë përmendur për t’u dërguar në një operacion të tillë.

“Koha Ditore” shkruan se gjatë marrjes në pyetje ata nuk i janë referuar së njëjtës mbledhje. I pari ka folur për mbledhjen e Jezercit, ndërsa i dyti për një mbledhje të mbajtur në Mollopolc. E mbledhja e Mollopollcit ka dalë të jetë organizuar disa ditë para asaj të Jezercit.

Por, edhe për mbledhjen e Jezercit ata nuk kanë dhënë dëshmi të njëjta. Çeku ka konfirmuar se në atë mbledhje ka marrë pjesë Limaj, ndërsa Zyrapi e ka thënë të kundërtën. /Telegrafi/