Zyrtarë të EULEX-it janë takuar me Dick Martyn

Është konfirmuar një takim midis zyrtarëve të EULEX-it dhe raportuesit të Këshillit të Evropës (KE), Dick Marty lidhur me pohimet e këtij të fundit për tregti me organe njerëzore nga ana e UCK-së gjatë vitit 1999.
“Po, definitivisht zyrtarë të EULEX-it kanë takuar dhe kanë biseduar me Dick Martyn”, ka thënë Nicholas Hawton, shef i Zyrës për Informim të EULEX-it, për portalin InfoGlobi.

Hetimet për akuzat me të cilat ngarkohet një numër individësh, pjesëtarë të ish-UCK-së dhe liderë të Kosovës nëse janë marrë me trafikimin e organeve të robërve të luftë, kërkesë që del nga Rezoluta e Parlamentit të KE-së, kanë filluar, mirëpo Hawton nuk është në dijeni se sa larg kanë shkuar ato, për shkak se për rrjedhën e hetimeve, ashtu siç e parasheh edhe ligji, janë më shumë në dijeni prokurorët dhe të shumtën e rasteve detajet e tyre mbahen larg publikut, dhe se për shkak të sensibilitetit që ngërthen vetë natyra e hetimeve.

Po ashtu Hawton nuk ishte në dijeni nëse është mbajtur ky takim në Strasburg apo në Bruksel. Megjithatë, ai është shumë i sigurt se akuzat për mungesën e një programi për mbrojtjen e dëshmitarëve nuk qëndrojnë dhe janë të pabaza.

“Jam absolutisht i sigurt se programi ynë për mbrojtjen e dëshmitarëve është program profesional dhe efikas, kështu që dyshimet që i bëhen atij janë krejtësisht të paqëndrueshme”, ka thënë zëdhënësi i EULEX-it. /Telegrafi/