Një rrugë me emrin e Tanit të Top Media

Ne 3-vjetorin e ndarjes nga jeta të themeluesit dhe ideuesit të
Top Media, Dritan Hoxha, një rruge në Prishtine ka marrë emrin e tij.
Komuna e Prishtinës ka vlerësuar kontributin e Dritan Hoxhës për
krijimin e një medie gjithë shqiptare dhe bashkimin shpirtëror të
Kosovës me Shqipërinë.“Emri i Dritan Hoxhës meriton të jetë
prezent në Prishtinë, sepse është një emër që integroi shqiptaret me një
media, të cilën nuk e kishim parë deri atëherë se si mund të
funksiononte, me një cilësi që ishte shumë e mirë për viset shqiptare,
me një kreacion që ishte shumë cilësor, por që i takonte vetëm atij”,
tha kreu i Komunës së Prishtinës, Isa Mustafa, njofton TCH.
“Ne jemi mirënjohës dhe këtë do ta shprehim edhe përmes dhënies së
emrit të një rruge në Prishtinë. Do të përcaktohemi që të jetë diku afër
qendrës dhe afër mediave, pasi Dritan Hoxha ia kushtoi jetën mediave
dhe zhvillimit të tyre”, tha Mustafa.
Kreu i komunës theksoi se është një dritare shumë e rëndësishme
shtrirja e mediave të Shqipërisë në Kosovë. “Uroj që të zhvillohet edhe
më tutje, të këmbejmë përvojat, dijet edhe njohuritë”. /Telegrafi/