Kryeparlamentari Krasniqi u takua me zv/presidentin e Senatit italian, Vannino Chiti

- Në kuadër të vizitës në Itali, kryetari i Kuvendit të Republikës së
Kosovës, Jakup Krasniqi dhe delegacioni që e shoqëron, u takua sot
pasdite me zv/presidentin e Senatit italian, z. Vannino Chiti.
Duke e
falënderuar zyrtarin e lartë italian për gjithë kontributin që Italia
ka dhënë për Kosovën, kryetari Krasniqi e ka njoftuar atë me zhvillimet
aktuale në Kosovë dhe të arriturat që ajo ka pasur në vitet e fundit.
Kreu i Kuvendit e ka njohur zv/presidentin e Senatit edhe me sfidat me
të cilat po përballet shteti i Kosovës, duke potencuar në këtë rast
problemet në veri të vendit.
Kreu i legjislativit, gjithashtu, ka bërë një pasqyrim të punës dhe përbërjes së Kuvendit të Kosovës.
Edhe në këtë takim kryetari Krasniqi ka kërkuar ndihmën italiane në procesin e integrimit evropian të Kosovës.
Zv/presidenti
i Senatit, Vannino Chiti, duke i uruar mirëseardhje kryeparlamentarit
Krasniqi dhe delegacionit që ai udhëheq, theksoi se momentet nëpër të
cilat po kalon Kosova, kujtojnë momentet e themelimit të Italisë, që,
sipas tij, kanë ngjashmëri shumë të madhe.
Integrimi i Kosovës në
Bashkimin Evropian, tha z. Chiti, është me rëndësi të madhe jo vetëm për
Kosovën, por edhe për Italinë dhe të gjitha shtetet e tjera anëtare të
BE-së, por foli edhe për kushtet që duhet plotësuar në këtë proces.
Sa
i përket liberalizimit të vizave, ai tha se edhe pse kjo është
kompetencë e qeverisë, do të bisedojë me Ministrinë e Punëve të Jashtme,
në mënyrë që të krijohen kushte për të ndihmuar lëvizjen e lirë të
qytetarëve të Kosovës, ka njoftuar Zyra për media dhe marrëdhënie me
publikun e Kuvendit të Kosovës.