Kurti: Kosovën po e bosnjanizojnë vendorët

Lideri i "Vetëvendosjes", Albin Kurti, në procesin e brendshëm zgjedhor
të Degës në Drenas, ka thënë se sfida që i pret në vazhdim është ndalja e
procesit të bisedimeve Kosovë-Serbi që për vendin tonë është i dëmshëm.
"Ata (Qeveria e Kosovës), janë duke e bosnjanizuar Kosovën. Këto
bisedime kanë nisur në Bruksel dhe me këto kushte pa asnjë parim nuk e
qojnë askund vendin, vetëm në interesa të Serbisë, dhe procesi ynë i
parë është ndalja e këtyre bisedimeve të dëmshme dhe e dyta është ndalja
e planit të shitjes së postes, KEK-ut dhe Trepçës, që më këto
privatizime po e bëjnë vendin sikur të jetojmë me qira në shtëpinë
tonë", ka deklaruar Kurti. Ai ka thënë se Kosova është duke kaluar ne
ditët më të vështira dhe ka shtuar se si opozitë do t'i ndalojnë këto
procese negative. Ai ka lavdëruar edhe programin e "Vetëvendosjes", duke
thënë se e mbara e Kosovës është vetëm në planin e VV-së, që nga këndi i
parë shihet bashkimi i trojeve shqiptare dhe plani i dytë zhvillimi
ekonomik i vendit. "Dikush ka shpresuar se ne mund të transformohemi
pasi të hymë ne Qeveri të bëhemi deputet, se do t'i ndalim protestat,
por ata janë gabuar se nuk do të ndalemi me veprimet demokratike që janë
në interes të vendit tonë", ka thënë Kurti.
Në Kuvendin e parë
zgjedhor të "Vetëvendosjes" në Drenas, kryetar i Degës është zgjedhur
Petrit Bajraktari, kurse kryesues i këshillit të brendshëm partiak Sokol
Bylykbashi e sekretar Ismet Dibrani.