Kurti: Thaçi me taktikë gueriljeje për veriun

Lideri i lëvizjes Vetëvendosje, Albin Kurti ka vlerësuar se nga veprimet e kryeministrit në veri që i ka parë deri tash, i është mbushur mendja se të premten nuk do të ketë ndonjë risi. Kurti, në një intervistë për “Kohën Ditore”, ka shprehur bindjen se Thaçi po i qaset gabueshëm kësaj pjese të Kosovës. Ka thënë për të të veprojë akoma me logjikën prej guerili.

Me paralajmërimin për të ndërhyrë në pikëkalimet kufitare në Jarinjë dhe në Bërnjak, sipas Kurtit, Thaçi po i trajnon strukturat e Serbisë, po i mobilizon ato dhe po i vendos në gjendje gatishmërie. Duke bërë këso aksionesh pa i ndërprerë njëkohësisht bisedimet me Serbinë, sipas tij, kryeministri “më parë se sa t’i shtojë sovranitet e integritet territorial Kosovës, po i shton tema të reja dialogut në Bruksel”.

Druan se veprimet në kufi po bëhen me hile. Gjykimi i tij është se, duke u fokusuar vetëm në pika dhe jo në territor, atëherë po luhet loja që Kosova, mbase, edhe do të mund t’i ketë të përforcuar kufijtë e jashtëm, por në kurriz të integritetit territorial të brendshëm.

Kurti, që drejton lëvizjen “Vetëvendosje”, subjekt opozitar i dyti për nga numri i deputetëve në Parlament, ka thënë se Thaçi po e ndihmon shumë Serbinë përmes bisedimeve me të në Bruksel, pasi që, sipas tij, asisoj kushtet e Bashkimit Evropian për Serbinë po bëhen kushte për Kosovën.

Në intervistë ai ka folur për nevojën e zgjedhjeve të parakohshme. Ndonëse të ngjashme kishte kur Thaçi mori mandatin e dytë prej kryeministri, Kurti ka shprehur bindjen se subjekti që përfaqëson ka marrë mësim nga to dhe tani do të mund ta mbronte votën nga vjedhja.

Ai ka folur për zhvillimet e brendshme në partinë e tij dhe për mënyrën se si i marrin vendimet. Ka dhënë edhe qëndrimin për dy prej çështjeve më të debatuara së fundi në Kosovë – amendamenteve të karakterit fetar që ishte synuar të futeshin në Ligjin për arsimin parauniversitar dhe çështjen e imunitetit të deputetëve./Telegrafi/