Fjalët e mëdha për veriun

Qeveria e Kosovës vazhdon të zotohet se do të shtrijë autoritetin kushtetues në veri të vendit. Ministri i Brendshëm, Bajram Rexhepi, ka thënë se janë të vendosur që të shpërbëjnë çdo strukturë ilegale serbe në Kosovë. Ndërsa, ekspertët politikë dhe ata të sigurisë vlerësojnë se në këtë aspekt ka më shumë fjalë se veprime.

Gjatë vizitës së tij në Graçanicë, Rexhepi ka thënë se Qeveria është e vendosur të shpërbëjnë çdo strukturë ilegale serbe në Kosovë.

“Ne do të bëjmë shpërbërjen, jo vetëm të strukturave paralele, por edhe atyre ilegale të sigurisë”, ka thënë ai.

Ramadan Qehaja, ekspert i sigurisë, mendon se ka ardhur koha të fillohet me shpërbërjen, ndryshe do të bëhet një bosnjëzim i situatës.

“Kjo nuk na duhet”, ka thënë ai për “InfoPress”, për të shtuar se për aksionin e 25 korrikut në veri është dashur një përgatitje më cilësore në aspektin e sigurisë.

“Pa mbështetjen në forcat tona të sigurisë nuk mund të kryhen detyrat e sigurisë në atë pjesë të territorit të Kosovës”.

Behxhet Shala ka thënë se në veri nuk ka struktura paralele, por struktura kriminale.

“Kemi dëshirë t’i shpërbëjmë ato struktura paralele, mirëpo nuk është e lehtë, sepse bashkësia ndërkombëtare është e vendosur t’i shpërbëj ato”, ka thënë ai, për të shtuar se Qeveria e Kosovës nuk është në gjendje të marrë veprime të tilla. /Telegrafi/