Kurti: Thaçi e ka të sigurt pushtetin

Lideri i Lëvizjes Vetëvendosje, Albin Kurti, konsideron se të gjitha të ligat që po i vijnë Kosovës kohën e fundit janë si pasojë e mungesës së sovranitetit, ndërsa përfshirjen e Kosovës në negociata me Beogradin, ai e quan tradhti.
Në një intervistë dhënë gazetës Zëri, lideri i Vetëvendosjes akuzon kryeministrin Hashim Thaçi dhe shokët e tij, si politikanë të pandreqshëm që për objekt e ka përfitimin personal dhe jo çështjen kombëtare.
“Hashim Thaçi e ka të sigurt pushtin aq sa është efektiv në procesin negociator dhe në atë të privatizimit”, thotë Kurti.
Po ashtu Kurti adresoi një varg akuzash në drejtim të procesit dialogues me Serbinë. Ky proces, sipas tij, është bërë me një qëllim, që t’i krijojë favore Serbisë dhe ta ndalojë zhvillimin e Kosovës.
Ndërsa, paralajmërimin e ardhjes së Borko Stefanovicit në Kosovë, Kurti e konsideron provokim, që duhet të ndalet. “ Të gjithë ne kemi përgjegjësi të reagojmë si qytetarë dhe subjekte kur na shkelet dinjiteti. Lëvizja jonë është kategorikisht kundër kësaj vizite poshtëruese për qytetarët e Kosovës”, tha Kurti, duke mos paralajmëruar ndonjë protestë kundër tij.
Po të ishte e formuar Qeveria nga lëvizja Vetëvendosje, atëherë sipas Kurtit, Borko Stefanovic “jo vetëm që s’do të mund të hynte në Kosovë, por as nuk do t’ia mësynte Kosovës”.
Numri një i Vetëvendosjes po ashtu flet edhe për debatin në Kuvend të Kosovës rreth çështjes së SHIK-ut. Për këtë të fundit, ai thotë se është e natyrës që opinioni të dijë të vërtetën për këtë strukturë, ndërsa pjesërisht i jep mbështetje Isa Mustafës, se SHIK-u është akoma aktiv dhe se ka ndikuar në arrestimin e zyrtarëve komunalë.
“Kësaj radhe besoj se të dyja palët kanë të drejtë: ka të drejtë Isa Mustafa që thotë se SHIK-u është ende aktiv, por nuk do të çuditesha nëse do të gjendej e vërtetohej korrupsioni e keqpërdorimet në komunën e Prishtinës”. /Telegrafi/