Pacolli nuk e ka parë strategjinë për lobim

“Mos e njihni Kosovën sepse kjo pengon dialogun e nisur ndërmjet
Prishtinës dhe Beogradit”, është motoja që është duke përdorur Serbia
ditëve të fundit për ta penguar njohjen e pavarësisë së Kosovës. Këtë e
ka deklaruar për Radio Dukagjinin, zëvendëskryeministri Behgjet
Pacolli. Sipas tij, dialogu po pengon njohjen e Kosovës. Pacolli këto ditë po qëndron në Afrikë në kuadër të lobimit për njohjen e pavarësisë së Kosovës.
Ai ka theksuar se është duke u përballur me diplomaci të ashpër të
Serbisë e cila po bënë thirrje që të mos njihet Kosova, tash kur kanë
nisur bisedimet. Madje Pacolli thotë se ky proces është duke penguar
njohjen e Kosovës.
“Mund të pengoj në çështjen e njohjeve. Sepse është shndërruar në
çështje të hapur dhe shtetet që nuk e kanë njohur Kosovën mund të thonë
tani të presim edhe pak deri në përfundimin e bisedave”, ka thënë
Pacolli.
Nga ana tjetër, duke folur lidhur për ndihmesën që është duke i bërë
në punën e tij, strategjia për lobim, e hartuar nga Ministria e Jashtme,
ai ka thënë se atë dokument nuk e ka parë ende.
“Sinqerisht nuk e kam parë atë strategji ende. Nuk kam ndi për atë strategji ende”, ka shtuar Pacolli
Ndryshe, njohja e fundit që i ka ardhur Kosovës është nga Omani me 4 shkurt të këtij viti. /Telegrafi/