NATO rishqyrton strategjinë e operacioneve në Libi

Ministrat e mbrojtjes së NATO-s, do të takohen në Bruksel për të
rishikuar rezultatet e fushatës ajrore dy mujore në Libi, pas thirrjeve
që janë bërë për vendet anëtare që të rrisin kontributin në këtë
mision.Javën e kaluar, aleanca u pajtua që të zgjerojë
operacionet e saj në Libi, edhe për një 90 ditësh tjetër si pjesë e
mandatit të dhënë nga OKB-ja, fushatë kjo që ka për qëllim të mbrojë
civilët nga sulmet e regjimit të Muamer Gaddafit.
NATO që prej asaj kohe ka kryer disa prej bombardimeve më të fuqishme në kryeqytetin e Libisë, Tripoli.
Në Washington, presidenti amerikan, Barack Obama, ka thënë se ka
pasur progres të rëndësishëm pas sulmeve të NATO-s, dhe se është “vetëm
çështje kohe” deri kur Gaddafi të largohet nga pushteti.
Mirëpo Gaddafi mbetët i palëkundur në qëndrimin e tij, pasi përmes
një mesazhi të transmetuar në televizionin shtetëror, ai ka thënë se do
qëndroj në vendin e tij “i gjallë apo i vdekur”.
Më vonë gjatë ditës, ministrat e mbrojtjes së NATO-s dhe Rusisë,
pritet të diskutojnë edhe planin perëndimor për mbrojtjen raketore në
Evropë, temë kjo që do diskutohet gjatë takimit në mes të Rusisë dhe
Këshillit të NATO-s. /Rel/Telegrafi/