Apple shet dy milionë iPad

Se Apple sërish ia ka qëlluar shënjestrës, është kuptuar qysh me rastin e paraqitjes së kompjuterit tablet iPad, mirëpo suksesi i tij tani po dëshmohet edhe me numra.
Apple ka njoftuar publikun se numri i pajisjeve të shitura iPad ka tejkaluar shifrën prej dy milionë, dhe atë pa u bërë tamam dy muaj pas paraqitjes së tij.

Kjo shifër së shpejti do të rritet edhe më shume kur kihet parasysh se gjatë fundjavës së kaluar ka filluar shitja edhe në Australi, Kanada, Francë, Gjermani, Itali, Japoni, Spanjë dhe Britani të Madhe, e gjatë korrikut fillon shitja edhe në nëntë tjera.
Programuesit deri më tani kanë zhvilluar mbi 5.000 aplikacione të ndryshme për iPad të cilat shfrytëzojnë aftësinë e tij Multi-Touch për udhëheqje me ekran, e në pajisje mund të shfrytëzohen edhe shumica e 200.000 aplikacioneve të cilat tanimë janë në dyqanin online të aplikacioneve App Store të Apple.