Kallëzimet e Antikorrupsionit mbyllen pa hetime

Raportimet anonime në Agjencinë Kundërkorrupsion (AKK) dhe procedimi i këtyre informatave në prokurori pa u ditur identiteti i raportuesit po shkaktojnë kokëçarje te prokurorët, të cilët merren me trajtimin e lëndëve të korrupsionit.
Këta të fundit ankohen se në mungesë të identitetit të denoncuesve u duhet të mbyllin hetimet, pasi nuk arrijnë të marrin informatat nga dora e parë, shkruan Kosova Sot.
Përderisa nga ana tjetër zyrtarët e AKK-së pranojnë se në raste të caktuara nuk ia bëjnë me dije prokurorit identitetin e denoncuesit. Mirëpo, sipas tyre nëse prokurori kërkon një ndërmjetësim, atëherë AKK-ja do ta bënte të mundur.
Sipas kryeprokurorit të Qarkut të Prishtinës, Aleksandër Lumezi, mungesa e identitetit të denoncuesit të korrupsionit i paraqet shumë probleme prokurorit, i cili e trajton një rast kallëzim penal të denoncuar nga AKK-ja, pasi prokurorit i duhet të sigurojë informata nga burime të tjera e jo nga vetë denoncuesi i rastit.
Mirëpo për të parin e AKK-së, Hasan Preteni, këto çështje nuk janë adresuar asnjëherë nga prokurorët.
“Të gjitha ‘problemet’ që ju thoni se i kanë prokuroritë me lëndët e agjencisë, ata duhet t’i adresojnë në agjenci për sqarime shtesë. Ne i kemi proceduar deri më tani për prokuroritë vendore dhe ndërkombëtare më shumë se 200 kallëzime penale. Në asnjë rast ato nuk i kanë kontestuar, nuk e kemi së paku asnjë shkresë që do shprehte ndonjë pjesë të problematikes që ju po e potenconi”, thotë Preteni.
Sipas tij, në asnjë rast agjencia nuk ka dërguar në prokurori kallëzime penale pa u mbështetur në prova.
Në AKK 30 për qind e rasteve personat që denoncojnë në procedurë dëshirojnë të jenë anonimë, anonimë në procedure, por jo anonimë për agjencinë. Por, sipas Pretenit, në çdo rast prokuroritë mund të kërkojnë ndërmjetësimin e agjencisë në bashkëpunimin - takimin me dëshmitarët. Preteni thotë se prokurorët e EULEX-it e bëjnë këtë procedurë shumë shpesh, ndërsa prokurorët vendorë nuk e kanë shfrytëzuar këtë mundësi asnjëherë. /Telegrafi/