Turqia ofron ndihmë në administrimin e burgjeve

Zëvendëskryeministri, njëherësh ministër i Drejtësisë i Republikës së Kosovë, Hajredin Kuçi në takim me ministrin e Drejtësisë të Republikës së Turqisë, Ahmet Kahraman janë pajtuar që Turqia të mbështes shtetin e Kosovës në krijimin e Akademisë së Drejtësisë, në administrimin e burgjeve, në veçanti burgjeve të tipit të hapur dhe në kompjuterizimin e gjykatave dhe prokurorive të Kosovës.

Në njoftimin për media thuhet se është biseduar për finalizimin dhe nënshkrimin e marrëveshjeve për bashkëpunim juridik ndërkombëtar në çështje penale, ku të dy ministrat janë pajtuar që të martën të nënshkruajnë tri marrëveshje, atë për ekstradim, transferim të personave të dënuar dhe bashkëpunim gjyqësor në çështje penale.

Pas këtij takimi, të dy ministrat thanë së Kosova dhe Turqia kanë bashkëpunim të mirë jo vetëm në fushën juridike, por edhe në fushën politike, ekonomike etj.

Po ashtu, u tha së në bazë të nevojës, Kosova dhe Turqia do të nënshkruajnë marrëveshje bashkëpunimi edhe në çështje civile. /Telegrafi/