Kirgistani i kërkon ndihmë Rusisë

Presidentja e përkohshme e Kirgistanit, Rosa Otunbayeva, thotë se i ka kërkuar Rusisë të dërgojë trupa për të ndihmuar në shtypjen e dhunës etnike që ka lënë të paktën 50 të vrarë dhe qindra të plagosur.
Otunbayeva tha se pa ndihmë nga jashtë, autoritetet vendase nuk do të jenë në gjendje t’i japin fund dhunës në qytetin jugor Osh, i dyti për nga madhësia në Kirgistan.

Ajo ka folur me kryeministrin e Rusisë, Vladimir Putin, për gjendjen dhe pak pas kësaj bisede, një lajm nga Moska bëri të ditur se nuk do të ketë lëvizje të menjëhershme trupash për në Kirgistan.

Rreth 650 njerëz janë plagosur në përleshjet mes shumicës kirgize dhe pakicës uzbeke në Osh që është baza e mbështetjes së ish presidentit Kurmanbek Bakijev.

Ai u përmbys nga pushteti dhe u largua nga vendi në fillim të muajit prill gjatë një kryengritjeje që la 85 të vdekur. /VoA/