S’ka bisedime nëse hapet tema e ndarjes së Kosovës

Ministri i Punëve të Brendshme, Bajram Rexhepi, të hënën ka tërhequr vërejtjen se nëse delegacioni serb në bisedimet Kosovë-Serbi do të insistojë që të hapë çështjen e ndarjes së Kosovës, atëherë delegacioni kosovar do ta lëshojë tavolinën e bisedimeve.

Ai edhe një herë u shpreh kategorik se nuk do të ketë ridizajnim të kufijve të shteteve të Ballkanit, sepse, sipas tij, kjo më pastaj nuk do të ndalet vetëm me Kosovën. Prandaj, idetë e hedhura kohëve të fundit nga Beogradi zyrtar për ndarjen e Kosovës në kohën kur po zhvillohen bisedimet teknike ne mes Kosovës dhe Serbisë, ministri i Punëve të Brendshme, Bajram Rexhepi, i quajti ide të çoroditura të shtetit serb dhe të paqëndrueshme.

Në një ligjëratë të mbajtur me studentët e Institutit për Studime Politike dhe Evropiane (ISPE), i pari i MPB-së, ka rikujtuar se ideja për ndarjen e Kosovës është në kuadër të politikës zyrtare të kamotshme të Beogradit, e cila po ngrihet nga qeveritarët e atjeshëm për kalkulimet dhe konsumin e tyre të brendshëm politik.

“Është shumë e qartë edhe nga Prishtina dhe nga faktorët ndërkombëtarë se çështja e ndarjes as që mund të vihet në tryezën e bisedimeve. Kosova në asnjë rast nuk do të hyjë në bisedime me Beogradin për çështje të tilla...nëse në tavolinën e bisedimeve do të tentohet që të hapet kjo temë, është obligim i palës kosovare që të lëshojë tryezën e bisedimeve”, ka thënë Rexhepi, njofton Zëri.

Duke rikujtuar edhe një herë se karakteri i bisedimeve Kosovë-Serbi është teknik, ai u shpreh optimist që ky dialog do t’iu shërbejë qytetarëve të të dyja shteteve për lëvizjen e lirë, por edhe shtensionimin politik dhe përmirësimin e raporteve të bashkëpunimit në mes Prishtinës dhe Beogradit. /Telegrafi/