Notë negative

Njëqind ditët e para të punës të Qeverisë së Kosovës vlerësohen negativisht nga analistët. Luan Shllaku e Mufail Limani thonë se gjatë kësaj periudhe, ekzekutivi nuk ka bërë pothuajse asgjë, në asnjë fushë.

Qeveria e dytë në krye me Hashim Thaçin i ka mbushur 100 ditë. Ky numër mund të ishte i dyfishuar nëse zgjedhjet e 12 dhjetorit do të kalonin pa vjedhje votash, shkruan Express.

Kosovarët, megjithatë kishin arritur të bëhen me Qeverinë e dytë që nga pavarësimi i vendit, vetëm më 22 shkurt, pas marrëveshjeve që Thaçi kishte bërë për krijimin e koalicionit.

Qysh në mbledhjen e parë, Thaçi e kishte shpallur qeverinë e re si më të mirën në historinë e qeverive të Kosovës. Por ky kabinet ishte përballur shpesh me kritikat e opozitës dhe pjesë të shoqërisë civile të cilat kanë akuzuar edhe për numrin e madh të njerëzve që janë “akomoduar” në ekzekutiv.

Dy analistët, Mufail Limani dhe Luan Shllaku në biseda me Express të mërkurën kanë vlerësuar se puna e qeverisë gjatë këtyre ditëve ka qenë minimale.

Shllaku ka përshkruar edhe procesin e krijimit të Qeverisë së Kosovës.

“Mënyra se si u konceptua Qeveria e re ishte ekskluzivisht e ndikuar nga pazaret politike që duhej bërë me partnerët e ri të koalicionit. S’kishte vizion fare për atë që i duhet Kosovës për të akceleruar projektet e mëdha zhvillimore” ka thënë Shllaku.

Analisti Mufail Limani duke vlerësuar 100 ditëshin e qeverisjes thotë se këtë periudhë të Qeverisë Thaçi e ka shënuar edhe zhvillimet që kanë të bëjnë me zgjedhjen e presidentit.

Limani thotë se një gjë e mirë që lidhet me qeverisjen ka të funksionimin minimal të shtetit të Kosovës. “Mendoj se këtë minimum kjo qeveri e ka arritur, mirëpo të gjithë ata që kërkojnë më shumë demokraci, më shumë zhvillim, më shumë fokus në çështjet vitale mendoj se qytetarët janë të pakënaqur”, ka shtuar ai. /Telegrafi/