Apetitet për pushtet lanë Kosovën pa mbështetjen e FMN-së

Veriu i Kosovës, bisedimet me Serbinë, marrëdhënia e re me FMN-në si dhe
çështja e pagave ishin temat e mbrëmshme, të debatuara ndërmjet tre
ministrave dhe përfaqësuesve të opozitës kosovare, në emisionin Rubikon
të KTV-së. Gjatë emisionit pati përplasje të fortë ndërmjet
pushtetarëve dhe opozitarëve.

Në këtë panel u debatuan çështjet e nxehta aktuale, siç janë
bisedimet me Serbinë, Veriu i Mitrovicës e rritja e pagave, e cila çoi
në një stad tjetër marrëdhëniesh ndërmjet Qeverisë dhe Fondit Monetar
Ndërkombëtar.

Suksesi i 100 ditëshit të Qeverisë, sipas zëvendëskryeministres
Mimoza Kusari Lila, është stabiliteti politik pas krizave të
njëpasnjëshme që ka kaluar koalicioni PDK-AKR.

Ndërsa, sipas Shpend Ahmetit të Vetëvendosjes, Qeveria e Kosovës ka
arritur vetëm të rrisë harxhimet me shtimin e numrit të ministrive, ku,
sipas Avdullah Hotit të LDK-së, vetëm kabineti qeveritar harxhon rreth
50 milionë euro.

Ndërkohë në qendër të vëmendjes ishte çështja e veriut të vendit dhe
bisedimet me Serbinë ku, sipas opozitarëve, rendi dhe ligji ishte
dashur të vihej në atë pjesë menjëherë pas pavarësisë së vendit, kurse
ministrat janë kundërpërgjigjur se prezenca e institucioneve ka nisur të
ndjehet edhe në atë pjesë.

Po ashtu opozita kritikoi ministrat e qeverisë Thaçi për
marrëdhënien e re që krijoi kjo e fundit me FMN-në, për shkak të
apetitit për pushtet, kurse ministrat u mburren se kanë mbajtur
premtimin e dhënë, edhe pse si pasojë këtë Kosova ka humbur kreditin
shumë milionësh që priti ta marrë nga Fondi Monetar Ndërkombëtar.
Ky debat u karakterizua me tone të ashpra, ironi dhe tallje ndërmjet debatuesve të pushtetit dhe atyre të opozitës.