FSK-ja mirëpret mbështetjen britanike

Stafi i lartë udhëheqës i Ministrisë së Forcës së Sigurisë së Kosovës është trajnuar në ngritjen e kapaciteteve të sigurisë nga ana e përfaqësuesve të Akademisë së Mbrojtjes së Britanisë së Madhe, të cilët u kanë dhënë mbështetje në zhvillimin e Strategjisë së Sigurisë së Kosovës.
Ministri në dorëheqje i FSK-së, Fehmi Mujota, ka mirëpritur mbështetjen nga ana e shtetit britanik. Vazhdim të mbështetjes në aspektin e sigurisë ka premtuar edhe përfaqësuesja e Ambasadës së Britanisë së Madhe, Ann Jackson.

“Është prioritet për ne që të vazhdojmë të punojmë për ta mbështetur FSK-në dhe sektorin e sigurisë në përgjithësi”, tha përfaqësuesja e Ambasadës së Britanisë së Madhe, njofton Koha.

Zhvillimi i Strategjisë së Sigurisë së Kosovës, sipas ministrit Mujota do t’i nënshtrohet një diskutimi të gjerë në Këshillin e Sigurisë së Kosovës. Edhe pjesëtarët e Forcës së Sigurisë do t`i vazhdojnë trajnimet në shtetet me të cilat Ministria e Forcës së Sigurisë ka marrëveshje.

Në këtë seminar janë trajnuar edhe stafi i Ministrisë së Punëve të Brendshme, përfaqësues të Policisë së Kosovës dhe Këshillit të Sigurisë së Kosovës.