Tadiq për Kosovën: Pak ne, pak Shqipëria

“Bashkimi i Kosovës me Shqipërinë është një nga zgjidhjet e
mundshme për t’i dhënë fund konfliktit në Ballkan, me kusht që Serbia të
marrë një pjesë të territorit të Kosovës”, ka deklaruar presidenti
serb, Boris Tadic.Në një intervistë për të përditshmen
konservative gjermane “Frankfurter Allgemeinen Zeitung”, Tadic po ashtu
ka thënë se kushdo që di ta lexojë historinë, do të shohë se krijim i
Shqipërisë së Madhe ka qenë një projekt afatgjatë politik i shqiptarëve.
“Shqipëria e madhe do të ishte në të vërtetë një projekt shumë i
rrezikshëm. Por, nëse ky projekt do të ishte pjesë e një zgjidhje të
madhe historike midis shqiptarëve dhe serbëve, ne serbët do të
pajtoheshim ta pranonim këtë zgjidhje. Kjo do të ishte një zgjidhe ku të
dyja palët do të merrnin diçka, ndërsa zgjidhja do të krijonte paqen
dhe stabilitetin e duhur”, ka thënë Tadic për FAZ, raporton RTK.
Sipas Tadiqit, një zgjidhje e tillë do të ishte një kontribut
skajshmërisht i madh. Në intervistë, në mënyrë indirekte, Tadiq ka lënë
të kuptohet se në këmbim të kësaj, pret bashkimin e Republikës serbe të
Bosnjës me Serbinë. “Unë nuk them se Shqipëria e madhe është zgjidhje
ashtu siç nuk besoj se edhe Serbia e madhe është një zgjidhje
madhështore. Ashtu siç jam edhe kundër ndarjes së Bosnjës, jam edhe
kundër politikës së krijimit të shteteve të mëdha. Prandaj, na lejoni të
përpiqemi të gjejmë zgjidhje praktike për problemet ekzistuese”, ka
thënë Tadic. /Telegrafi/