Tadiq u propozon radikalëve serbë ndarjen e Kosovës

Presidenti aktual i Serbisë, Boris Tadiq, iu ka propozuar ndarjen e Kosovës liderëve më radikalë të veriut të Mitrovicës dhe të Kosovës, Marko Jakshiqit dhe Millan Ivanoviqit.
Marko Jakshiq, kryetar i Partisë Demokratike të Serbisë për Kosovë të Vojisllav Koshtunicës, ka deklaruar për media serbe në veri të Mitrovicës se kryetari i Serbisë, Boris Tadiq, ka propozuar ndarjen e Kosovës si zgjidhje të problemit, duke shtuar se udhëheqësia e tanishme në Beograd është duke udhëhequr një politikë antishtetërore ndaj, siç është shprehur ai, Krahinës.
Pushtetarët e tanishëm, që janë në fuqi, kanë tentuar të paraqesin DSS-në si parti e cila
dëshiron ndarjen e Kosovës, duke treguar se gjoja janë duke udhëhequr një politikë
e cila angazhohet për territorin e Serbisë. “Haptas do t’ju them që kam pasur ofertë direkte unë ( Marko Jakshiq v.j) dhe Millan Ivanoviq nga presidenti i Serbisë, Boris Tadiq, që të ndajmë Kosovën, që veriu që nga lumi Ibër t’i bashkohet Serbisë, ndërsa pjesa tjetër e Kosovës të bashkohet me Shqipërinë”, ka thënë Jakshiq. Unë mendoj se kur është në pyetje Kosova, Serbia duhet të udhëheqë një politikë të fortë shtetërore, sepse vetëm këmbëngulësia mundet përsëri ta kthejë Kosovën në Serbi”. Raportin e Dick Martyt, Jakshiq e shef si një shans të mirë që Serbia ta kthejë Kosovën në gjirin e saj territorial brenda një periudhë kohore të caktuar. “Tanimë, pas raportit të Dick Martyt, shanset janë shumë më të qarta he mendoj se brenda 10 vjetëve Kosova prapë do të jetë nën integritetin e Serbisë”, ka thënë Jakshiq.
“Qendrimi i SNS-së është shumë i paqartë, por një gjë dihet se DSS-ja nuk do të
jetë pjesë e pushtetit që tregton Kosovën për Bashkimin Evropian, por do të jemi në
anën e atyre që do të luftojnë për të ruajtur tërësinë territoriale të shtetit të Serbisë. DSS-ja për kurrfarë çmimi nuk do të ndryshojë qëndrimin e saj nacional dhe politik”, ka thënë Jakshiq.