Përurohet rruga “B” në Prishtinë

Kryetari i Prishtinës, Isa Mustafa, me bashkëpunëtorë, të dielën
kanë bërë përurimin e rrugës “B”, e cila lidhet me rrugët “Muharrem
Fejza” dhe “Enver Maloku”.Mustafa këtë projekt e ka
vlerësuar si shembullin më të mirë për atë se çfarë po bënë Komuna e
Prishtinës në përmirësimin e jetës së qytetarëve, raportoi RTV 21.
“Jemi këtu me udhëheqësit e dikastereve të komunës, në Ditën
Ndërkombëtarë të Mjedisit, ditë kjo që promovon një jetë më të mirë, me
ambient më të mirë, infrastrukturë më të mirë, dhe ne po bëjmë çmos që
qytetarët e kryeqendrës të kenë parqe më shumë, rrugë më të mira, dhe
infrastrukturë të standardeve bashkëkohore”, ka thënë Mustafa.
Projekti për ndërtimin e rrugës “B” faza e parë, së bashku me rrugët
lidhëse “Enver Maloku” dhe “Muharrem Fejza” ka një vlerë prej 4.3
milionë eurove.
Pas përurimit të rrugës, kryetari Mustafa ka vizituar parqet në
lagjet Ulpiana dhe Taukbahçe, ku në mënyrë simbolike bëri mbëltimin e
një druri dekorativ me rastin e Ditës Ndërkombëtare të Mjedisit. /Telegrafi/