Rruga e Serbisë në BE kalon nëpër Kosovë

Institucioni ekzekutiv i BE-së, Komisioni Evropian, ka bërë të
ditur të martën se anëtarësimi i Serbisë në bllokun evropian nuk mund të
bëhet pa pasur një përmirësim të marrëdhënieve midis Beogradit dhe
Prishtinës.Zyrtarët evropianë kanë përkujtuar se fqinjësia e
mirë është një ndër kriteret për pranimin e anëtarëve të rinj në BE,
raportoi Dtt-net
“Serbia duhet që të normalizojë marrëdhëniet me Kosovën për të mundur
anëtarësuar në BE. Kjo është ndër kriteret e fqinjësisë së mirë në
kriteret e Kopenhagës për anëtarësim”, ka thënë zëdhënësja e Komisionit
Evropian, Natasha Butler.
Mirëpo, tash për tash mbetet e paqartë se çka do të thotë në mënyrë specifike fjala “normalizim”.
Disa zyrtarë të BE-së të cilët deshën të mbesin anonim, thonë se
fjala “normalizim” nuk ka aspak kuptim të qartë dhe se ajo nënkuptohet
varësisht se si duan njerëzit.
Sipas disave do të duhej që Serbia dhe Kosova të njihnin njëra
tjetrën, si mënyrën më të mirë për të debllokuar hyrjen e të dy vendeve
në BE, sepse Serbia e cila ka gjasa të hyjë e para, ajo do të përdorte
të drejtën e vetos brenda BE-së kundër Kosovës.
Trakti i Lisbonës thotë se zgjerimi i BE-së përkatësisht pranimi i
anëtarëve të rinj bëhet vetëm me pajtimin e të gjitha vendeve anëtare.
Mirëpo, sipas të tjerëve, “normalizimi” do të thotë edhe çdo pajtim
tjetër për çështje të tjera midis Serbisë dhe Kosovës që nuk do të
kishte të bënte me statusin, pavarësinë e Kosovës.
Vendet e BE-së aktualisht janë të ndara në dy blloqe dhe se ato ende
nuk kanë qëndrim të qartë dhe unik se çfarë do të duhej të ndodhte midis
Serbisë dhe Kosovës, rreth statusit- pavarësisë së Kosovës, në mënyrë
që këto dy vende të hyjnë në BE.
Fakti se pesë shtete - Greqia, Spanja, Qipro, Rumania dhe Sllovakia -
nuk e njohin pavarësinë e Kosovës, e bënë edhe më të ndërlikuar gjetjen
e formulës magjike për të zbërthyer fjalën “normalizim” për të cilën
flet Komisioni Evropian. /Tellegrafi/