MFSK do atashe nëpër ambasada, MPJ jo

Ministria e Forcës së Sigurisë së Kosovës (MFSK) ka ndërmarrë iniciativën për të instaluar atashe ushtarakë nëpër ambasadat e Kosovës. Iniciativa ende nuk është formalizuar, ngaqë në formë zyrtare nuk ka shkuar në Ministrinë e Punëve të Jashtme (MPJ).

Por, kjo ka hyrë në agjendën e ministrit Agim Ceku. Zëvendësministri i tij, Shemsi Veseli ka konfirmuar këtë të dhënë të shtunën për Kohën Ditore, por ka deklaruar se duhet edhe disa kohë derisa të merret vendimi për emërimin e atasheve.

Ai ka thënë se duhet marrë edhe mbështetja nga faktorë relevantë ndërkombëtarë, para se të aprovohet një vendim i këtillë.

“Në kuadër të strategjisë së zhvillimit të ushtrisë, gjegjësisht FSK-së, normalisht parashihet edhe kjo, Është shumë e natyrshme që shteti i Kosovës planifikon të ketë edhe atashetë ushtarakë në kuadër të ambasadave”, ka thënë Veseli.

Në MPJ thonë se ende nuk e shqyrtuar ende një kërkesë të tillë dhe as një mundësi të tillë. Zëvendësministri Ibrahim Gashi ka thënë se në diplomacinë kosovare nuk ka kapacitete të mëdha të angazhuara, të akredituara jashtë vendit.

“Natyrisht, shtetet si Kosova nuk kanë shumë mundësi të dërgojnë shumë njerëz jashtë, për shkak të kostos që ka mbajtja e një misioni”, ka thënë Gashi.

Sipas një burimi ndërkombëtar nuk dihet se sa larg mund të shkohet me këtë ide, pasi që as shtetet që e kanë njohur Kosovën nuk e konsiderojnë FSK-në si ushtri. /Telegrafi/