Kuota e grave, në rrezik

Një nga pikat e diskutimit të procesit të ndryshimit të Ligjit
për zgjedhjeve do të jetë edhe kuota gjinore, për të cilën janë duke
qarkulluar ide që të ndryshohet, por që zyrtarisht askush nuk e thotë
këtë.Me aktet aktuale në fuqi është institucionalizuar
30-përqindëshi i përfaqësimit të grave në trupin legjislativ. Kjo më
tepër për shkak të eliminimit të diskriminimit gjinor.
Në Komisionin për ndryshimin e Ligjit zgjedhor është përmendur edhe
çështja e kuotës gjinore, ajo që do të shqyrtohet, sikur të gjitha pikat
një nga një të ligjit, shkruan Kosova Sot.
Një pjesë e mirë e deputeteve flasin mjaft për tendencat e ndryshimit
të kuotës, por zyrtarisht askush nuk dëshiron të deklarohet. Në
zgjedhjet e fundit janë dëgjuar kritika, sipas të cilave për shkak të
kuotës ndonjë kandidate që ka fituar numër të mjaftueshëm votash nuk ka
arritur të sigurojë ulëse në Kuvend.
Nënkryetari i komisionit, Xhavit Haliti, i cili nuk ka dëgjuar asnjë
lloj formule që bën fjalë për ndryshimin e kuotës gjinore, konsideron që
edhe gjinia femërore kuotën duhet ta ketë të garantuar nga partia që të
jetë në listë, por edhe ato duhet të luftojnë më shumë për t’i fituar
votat.
“Personalisht konsideroj që deputetët duhet të përgatiten, të bëjnë
fushatë dhe t’i fitojnë zgjedhjet me meritë. Tani me ligjin ekzistues,
femra e ka të garantuar 30-përqindëshin. Ne e kemi formuar një komision
për ndryshimin e Ligjit dhe të Kushtetutës, e nëse Kushtetuta parasheh
ndonjë ndryshim, atëherë edhe komisioni për zgjedhje duhet të veprojë në
përputhje me atë që e thotë Kushtetuta. Diskutimet dhe pretendimet mund
të jenë të ndryshme, është e drejtë e secilit të mendojë dhe të veprojë
sipas dëshirës së vet. Por, në asnjë rast në kundërshtim me Kushtetutën
dhe ligjet në fuqi”, ka thënë Haliti.
Ai nuk e ka përjashtuar mundësinë që ndryshimet në Ligjin për zgjedhje të preket edhe kjo çështje. /Telegrafi/