Kadaj-Bujupi demanton organizatën “Fol”

Deputetja e Aleancës për Ardhmërinë e Kosovës, Donika
Kadaj-Bujupi, e demanton si krejtësisht të pavërtetë, shpifëse dhe
spekulative të dhënën e OJQ “Fol”, të publikuar në media, për, siç është
raportuar, pasurimin e saj të shpejtë.Deputetja
Kadaj-Bujupi ka deklaruar se ajo edhe një herë i ka verifikuar
formularët e faqeve zyrtare në internet, rreth publikimit të pasurisë
nga ana e saj dhe ka vërtetuar se nuk është bërë ndonjë gabim në
deklarimin e pasurisë.
“Shumat marramendëse, të publikuara nga Organizata “Fol”, janë
shpifje të qëllimshme, tendencioze dhe përbëjnë vepër të qartë penale”,
thuhet në reagimin e znj. Kadaj-Bujupi.
“Unë edhe një herë e njoftoj opinionin publik se pasuria ime është
publike dhe ekziston edhe në ueb-faqen zyrtare të Agjencionit Kundër
Korrupsionit, kurse deklaratat si kjo e Organizatës ‘Fol’ kanë për
qëllim degradimin e personalitetit tim dhe të punës që bëj në
Parlamentin e Kosovës”, thuhet në reagim.
Deputetja e AAK-së konsideron se është për keqardhje kur me qëllim të
prodhimit të lajmit, edhe atëherë kur ai nuk është i vërtetë dhe kur
nuk bazohet në fakte, organizata të ndryshme fyejnë dhe cilësojnë për të
keq personalite të caktuara publike.
"Unë i inkurajoj OJQ-të që të punojnë në drejtim të rritjes së
transparencës, mirëpo, gjithashtu, i ftoj që të jenë të sakta dhe etike
dhe të mos bëhen vegël e mekanizmave të ndryshëm për t’i luftuar
oponentët politikë dhe ata të cilët e kanë guximin të veprojnë për të
mirën e vendit”, thuhet në reagimin e deputetes Kadaj-Bujupi. /Telegrafi/