LDK: Qeveria po e përdorë policinë për ruajtjen e pushtetit

Grupi i ekspertëve për siguri i Lidhja Demokratike e Kosovës
(LDK) ka kundërshtuar memorandumin për bashkëpunim ndërmjet Ministrisë
së Forcës së Sigurisë dhe Ministrisë së Punëve të Brendshme. Sipas këtij
grupi, tendencat për këtë memorandum implikon tendencë të rrezikshme që
mund të shfaqet në shtetet jodemokratike.Gazmend Muhaxheri,
udhëheqës i grupit për siguri të LDK-së ka ftuar ministrat Agim Çeku e
Bajram Rexhepi të rishikojnë përmbajtjen e këtij dokumenti, duke larguar
të gjithë fjalorin që rrezikon të ardhmen e FSK-së, që bie ndesh me
Kushtetutën, ligjet dhe kompetencat e institucioneve që ata
përfaqësojnë.
Muhaxheri ka kundërshtuar edhe krijimin e Agjencisë kundër
terrorizmit dhe Agjencinë kundër krimit në kuadër të Zyrës së
Kryeministrit, për të cilat janë ndarë 300 mijë euro dhe, që sipas tij,
nuk kanë mbikëqyrje parlamentare. “Në formën se si janë themeluar, jo që
mund të ofrojnë siguri për qytetarët, por përkundrazi përbëjnë kërcënim
direkt të saj, pasi që kanë tendencë të përdoren për qëllime politike
dhe individuale”, tha Muhaxhiri, njofton RTK.
”Që nga ardhja në pushtet e Hashim Thaçit, e gjithë struktura
komanduese dhe organizative e policisë së Kosovës ka pësuar ndryshime
drastike, e në veçanti shtylla kundër krimit”,, ka deklaruar Muhaxhiri.
Sipas tij, qeverisja aktuale nuk ofron siguri, por e përdorë policinë si
instrument për ruajtjen e pushtetit. /Telegrafi/