Të dyshuarit, të papenguar drejt pushtetit

Prishtinë, 14 dhjetor – Koha Ditore, sot, në një tekst analitik, shkruan se njerëzit me hipotekë të dyshimtë nuk do t’i pengojë kurrkush në rrugën për të zënë apo rizënë ulëse në Kuvendin e Kosovës.
Sipas gazetës, ligji ua ndalon kandidimin për deputetë vetëm të dënuarve, e të dyshuarve jo. Shoqëria civile ka thënë se nuk do t’i etiketojë si të korruptuar asnjërin nga politikanët e dyshuar. E, në misionin evropian për sundimin e ligjit, EULEX, kanë treguar se nuk do të përshpejtojnë apo ngadalësojnë procesin e hetimit të zhvilluar ndaj këtyre pretendentëve për të ardhur në institucionet e Kosovës.
Midis emrave që kanë zënë vend në listat e kandidatëve të subjekteve politike për deputetë, ka të dënuar jo shumë moti, ka të tillë, ndaj të cilëve po zhvillohen procese gjyqësore dhe ka që janë nën hetime. Madje, ka bartës listash me këso problemesh, e po kështu një numër i madh sish ndodhen edhe në dhjetëshe të këtyre listave.
Organizata për demokraci, antikorrupsion dhe dinjitet, “Çohu”, shpesh harton raporte që flasin për korrupsionin dhe krimin e organizuar në institucione. Avni Zogiani, drejtor i organizatës, ka thënë se vetë nuk ka kapacitete për të bërë një “listë të zezë” me emra të njerëzve të inkriminuar që tash po i sheh si kandidatë.
Ai ka treguar arsyet pse nuk mund të ketë një koalicion të organizatave të shoqërisë civile, që do ta bënin një gjë të tillë, e cila aplikohet në shumë vende të botës.
“Në 2007-n ka pasur një koalicion të gjerë të organizatave të shoqërisë civile. Ndërkohë, për një kohë të gjatë është investuar shumë te një numër i madh i organizatave, pikërisht nga aktorët që e kontrollojnë tërë procesin, në mënyrë që të mos kenë qëndrim të ashpër ndaj krimit në politikë”, ka thënë Zogiani. “Sot e kanë një gjuhë krejt tjetër”.
Zogiani ka shprehur qëndrimin se, nëse në nivele të larta të Qeverisë ka njerëz të inkriminuar, shoqëria civile do të duhej të ishte ajo që do t’i përmendte emrat.