Sovranitet është edhe e drejta për tu bashkuar me Shqipërinë

Lëvizja Vetëvendosje është një subjekt që është opozitë edhe
brenda edhe jashtë parlamentit, një subjekt që dallon nga gjithë të
tjerët për shkak se shtetndërtimin e sheh si sovranitet, që nënkupton
edhe të drejtën për t’u bashkuar me Shqipërinë, edhe të drejtën për të
pasur ushtri, edhe kontrollin mbi resurset natyrore dhe kapacitetet
zhvillimore, ka thënë lideri i kësaj lëvizje, Albin Kurti.“Programi
politik i Lëvizjes Vetëvendosje është në frymën e veprimtarëve të
çështjes kombëtare për gjatë gjithë historisë. Në duam që ta kthejmë
historinë tonë kombëtare në politikë, politikën t’ia kthejmë idealeve,
ekonominë t’ia kthejmë shoqërisë, dhe kësisoj ta krijojmë një tërësi
organike, ku qytetari është ai në shërbim të të cilit është shteti e
pushteti” theksoi Kurti para delegatëve të Lëvizjes në Skenderaj.
Këtë mbledhje zgjedhore e përshëndeti edhe deputeti i Lëvizjes
Vetëvendosje, Rexhep Selimi, i cili i falenderoi aktivistët dhe
qytetarët e kësaj komune për punën e madhe që kanë bërë dhe po vazhdojnë
të bëjnë për çështjen kombëtare. /Telegrafi/